Бугун «Ҳилол-нашр» марказий савдо мажмуасида ушбу нашриётда чоп этилган Ўзбекистон халқ ёзувчиси Тоҳир Маликнинг «Шайтанат» романи (2 жилдли қайта нашри) ва «Дока рўмол қачон қурийди» китоблари тақдимоти бўлиб ўтди.
Тақдимотда ёзувчилар, ижодкорлар, имом-хатиблар, матбуот ва оммавий ахборот вакиллари ҳамда адабиёт мухлислари иштирок этди.
Тақдимот аввалида севимли ёзувчимиз сўз олиб, адабиётнинг асосий вазифаси, инсон ҳаётида илм-маърифатнинг, китобнинг тутган ўрни ҳақида гапирди. «Бадиий адабиёт билан диний илм бирлашмас экан, биз ҳали кўп адашиб юрамиз… Бир замонлар ўзбек халқини диндан чиқаришда ўзбек зиёлилари пешқадам бўлган эдилар. Энди ҳақ динга қайтаришда ҳам зиёлиларимиз пешқадам бўлишлари керак» деди Тоҳир Малик.
«Ҳилол-нашр» нашриётида нашр этилган «Шайтанат» романи 2 жилдли бўлиб, унинг 1-жилдига асарларнинг 1-3-китоблари, 2-жилдига 4-5-китоблари киритилган. Мухлисларнинг фикрлари, таклифлари ва мулоҳазаларини инобатга олиб, ёзувчи романни қайта таҳрир қилган, айрим ўзгаришлар, қўшимчалар киритган. Ноўрин жойларни қисқартирган.
«Дока рўмол қачон қурийди» китобида оилавий масалалар, эр-хотинлик ҳуқуқ ва мажбуриятлари ҳақида сўз боради. Унда шу мавзудаги ҳадислар, буюк алломалар фикрлари жамланган. Шунингдек муаллифнинг мақола ва ҳикоялари киритилган.
Тадбир сўнггида муаллиф китобларини имзолаш маросими бўлиб ўтди.
Bugun «Hilol-nashr» markaziy savdo majmuasida ushbu nashriyotda chop etilgan O‘zbekiston xalq yozuvchisi Tohir Malikning «Shaytanat» romani (2 jildli qayta nashri) va «Doka ro‘mol qachon quriydi» kitoblari taqdimoti bo‘lib o‘tdi.
Taqdimotda yozuvchilar, ijodkorlar, imom-xatiblar, matbuot va ommaviy axborot vakillari hamda adabiyot muxlislari ishtirok etdi.
Taqdimot avvalida sevimli yozuvchimiz so‘z olib, adabiyotning asosiy vazifasi, inson hayotida ilm-ma’rifatning, kitobning tutgan o‘rni haqida gapirdi. «Badiiy adabiyot bilan diniy ilm birlashmas ekan, biz hali ko‘p adashib yuramiz… Bir zamonlar o‘zbek xalqini dindan chiqarishda o‘zbek ziyolilari peshqadam bo‘lgan edilar. Endi haq dinga qaytarishda ham ziyolilarimiz peshqadam bo‘lishlari kerak» dedi Tohir Malik.
«Hilol-nashr» nashriyotida nashr etilgan «Shaytanat» romani 2 jildli bo‘lib, uning 1-jildiga asarlarning 1-3-kitoblari, 2-jildiga 4-5-kitoblari kiritilgan. Muxlislarning fikrlari, takliflari va mulohazalarini inobatga olib, yozuvchi romanni qayta tahrir qilgan, ayrim o‘zgarishlar, qo‘shimchalar kiritgan. Noo‘rin joylarni qisqartirgan.
«Doka ro‘mol qachon quriydi» kitobida oilaviy masalalar, er-xotinlik huquq va majburiyatlari haqida so‘z boradi. Unda shu mavzudagi hadislar, buyuk allomalar fikrlari jamlangan. Shuningdek muallifning maqola va hikoyalari kiritilgan.
Tadbir so‘nggida muallif kitoblarini imzolash marosimi bo‘lib o‘tdi.
