Ўзбекистонлик ҳожилар Маккаи мукаррамада

Рукн: Янгиликлар Чоп этилган: 09.11.2011

Ватанимиздан Муборак Ҳаж сафари нияти ила чиққан 5000 нафар юртдошларимиз Маккаи Мукаррама зиёратини давом эттирмоқдалар.

Мадинаи мунавварадан шинам автобусларда Маккаи мукаррамага келган юртдошларимиз Масжидул ҳарамдан 5 км масофадаги меҳмонхонадан жой олдилар.

Ҳожиларимиз Маккаи мукаррамага ташриф буюриб, хушу‘ билан, талбия ва такбир айтган ҳолда Масжидул Ҳарамга кирдилар. Етти марта қудум тавофи, рамл, ҳажарул асвад зиёрати амалларини бажарган ҳожилар, зам-зам сувидан қониб ичдилар.

Сафо ва Марва са‘йларини ҳам бажарган ҳожиларимиз Зулҳижжанинг саккизинчи куни (4-ноябр) тонгда Маккаи мукаррамада Минога йўл олдилар ва Арафа куни бомдод намозини ўқигунча Минода турдилар.

Ҳожиларимиз Зулҳижжанинг тўққизинчи куни (5 ноябр) Минода бомдод намозини ўқигач, Арафотга чиқдилар ва Раҳмат тоғига яқин жойда вуқуф қилдилар. Қуёш ботгач, барча ҳожиларимиз Муздалифага боришди ва ўша ерда тунни ўтказдилар.

Зулҳижжанинг ўнинчи куни (Қурбон ҳайити куни, 6 ноябр) бомдод намозини эрта вақтда ўқигач, ҳожиларимиз Муздалифада бир лаҳза вуқуф қилиб, такбир, таҳлил ва Пайғамбаримиз с.а.в.га саловот айтиб, дуо қилдилар. Тонг ёришгач, Минога йўл олдилар ва шайтонга тош отиш амалини бажардилар.

Қурбон ҳайитининг иккинчи (7 ноябр) ва учинчи (8 ноябр) кунлари шайтонга тош отиш амалини бажарган юртдошларимиз Байтуллоҳ тавофини амалга оширмоқдалар.

Сўнгги марта видо тавофини амалга оширган ҳожилар учун Ҳаж амаллари якунланади.

Ҳожиларимизнинг дастлабки гуруҳи Жидда-Тошкент йўналиши бўйича куни 11 ноябр куни Ватанимизга қайтадилар. 24 ноябргача барча юртдошларимиз юртимизга қайтадилар.

* * *

Vatanimizdan Muborak Haj safari niyati ila chiqqan 5000 nafar yurtdoshlarimiz Makkai Mukarrama ziyoratini davom ettirmoqdalar.

Madinai munavvaradan shinam avtobuslarda Makkai mukarramaga kelgan yurtdoshlarimiz Masjidul haramdan 5 km masofadagi mehmonxonadan joy oldilar.

Hojilarimiz Makkai mukarramaga tashrif buyurib, xushu‘ bilan, talbiya va takbir aytgan holda Masjidul Haramga kirdilar. Yetti marta qudum tavofi, raml, hajarul asvad ziyorati amallarini bajargan hojilar, zam-zam suvidan qonib ichdilar.

Safo va Marva sa‘ylarini ham bajargan hojilarimiz Zulhijjaning sakkizinchi kuni (4-noyabr) tongda Makkai mukarramada Minoga yo‘l oldilar va Arafa kuni bomdod namozini o‘qiguncha Minoda turdilar.

Hojilarimiz Zulhijjaning to‘qqizinchi kuni (5-noyabr) Minoda bomdod namozini o‘qigach, Arafotga chiqdilar va Rahmat tog‘iga yaqin joyda vuquf qildilar. Quyosh botgach, barcha hojilarimiz Muzdalifaga borishdi va o‘sha yerda tunni o‘tkazdilar.

Zulhijjaning o‘ninchi kuni (Qurbon hayiti kuni, 6-noyabr) bomdod namozini erta vaqtda o‘qigach, hojilarimiz Muzdalifada bir lahza vuquf qilib, takbir, tahlil va Payg‘ambarimiz s.a.v.ga salovot aytib, duo qildilar. Tong yorishgach, Minoga yo‘l oldilar va shaytonga tosh otish amalini bajardilar.

Qurbon hayitining ikkinchi (7-noyabr) va uchinchi (8-noyabr) kunlari shaytonga tosh otish amalini bajargan yurtdoshlarimiz Baytulloh tavofini amalga oshirmoqdalar.

So‘nggi marta vido tavofini amalga oshirgan hojilar uchun Haj amallari yakunlanadi.

Hojilarimizning dastlabki guruhi Jidda-Toshkent yo‘nalishi bo‘yicha kuni 11-noyabr kuni Vatanimizga qaytadilar. 24-noyabrgacha barcha yurtdoshlarimiz yurtimizga qaytadilar.