Ўзбекистонлик ҳожилар Мадинаи Мунавварада (фото)

Рукн: Янгиликлар Чоп этилган: 25.10.2011

Мадинаи мунавваридан мухбиримиз хабар қилади:

2011-йилнинг 19-октябридан Саудия Арабистонининг Мадина шаҳрига келишни бошлаган ўзбекистонлик зиёратчилар Ўзбекистон мусулмонлари идораси раиси, муфтий Усмонхон Алимов бошчилигида муқаддас шаҳар зиёратини давом эттирмоқдалар.

Ҳожиларимиз қулай шароитларга эга бўлган “Марказ Тоййиба Саканий” меҳмонхонасига жойлаштирилди. Ушбу меҳмонхона "Масжиди Набавия" билан туташ бўлиб, зиёратчилар барча намозларни ушбу масжидда ўқимоқдалар.

Зиёратчилар дастлаб “Масжиди Набавий”да ибодат қилиб, Муҳаммад (с.а.в.)нинг қабрлари жойлашган муборак равзани зиёрат қилдилар. Шундан сўнг ҳожилар улуғ саҳобалар дафн этилган “Уҳуд тоғи”, ислом тарихидаги илк ибодатгоҳ ҳисобланадиган “Қубо” ва икки қиблали “Масжиди қиблатайн” масжидларини зиёрат қилдилар.

Ишчи гуруҳи аъзолари ва элликбошилар зиёратчиларга Ҳаж амалларини тўла-тўкис бажаришлари учун зарур тушунчаларни бериб, амалий ишларни уюшқоқлик билан амалга оширмоқдалар.
Малакали шифокорлар ҳожиларнинг соғлиқларини доимий назоратга олиб, зарур профилактик муолажаларни амалга оширмоқдалар.

Ўзбекистондан келган ошпазлар зиёратчиларга миллий таомлар тайёрлаб, кўнгилларини хушнуд этмоқдалар.

Зиёратчилар муқаддас Ҳаж амалларини бажариш учун яратиб берилаётган қулай шароитлардан мамнун эканликларини изҳор этиб, юртимиз тинчлиги ва равнақини сўраб дуо қилмоқдалар.

Мадина зиёратини тугатган ўзбекистонлик ҳожилар ҳаж амалларини бажариш учун Маккаи Мукаррамага жўнаб кетдилар.

* * *

Madinai munavvaridan muxbirimiz xabar qiladi:

2011-yilning 19-oktabridan Saudiya Arabistonining Madina shahriga kelishni boshlagan o‘zbekistonlik ziyoratchilar O‘zbekiston musulmonlari idorasi raisi, muftiy Usmonxon Alimov boshchiligida muqaddas shahar ziyoratini davom ettirmoqdalar.

Hojilarimiz qulay sharoitlarga ega bo‘lgan “Markaz Toyyiba Sakaniy” mehmonxonasiga joylashtirildi. Ushbu mehmonxona "Masjidi Nabaviya" bilan tutash bo‘lib, ziyoratchilar barcha namozlarni ushbu masjidda o‘qimoqdalar.

Ziyoratchilar dastlab “Masjidi Nabaviy”da ibodat qilib, Muhammad (s.a.v.)ning qabrlari joylashgan muborak ravzani ziyorat qildilar.  Shundan so‘ng hojilar ulug‘ sahobalar dafn etilgan “Uhud tog‘i”, islom tarixidagi ilk ibodatgoh hisoblanadigan “Qubo” va ikki qiblali “Masjidi qiblatayn” masjidlarini ziyorat qildilar.

Ishchi guruhi a’zolari va ellikboshilar ziyoratchilarga Haj amallarini to‘la-to‘kis bajarishlari uchun zarur tushunchalarni berib, amaliy ishlarni uyushqoqlik bilan amalga oshirmoqdalar.
Malakali shifokorlar hojilarning sog‘liqlarini doimiy nazoratga olib, zarur profilaktik muolajalarni amalga oshirmoqdalar.

O‘zbekistondan kelgan oshpazlar ziyoratchilarga milliy taomlar tayyorlab, ko‘ngillarini xushnud etmoqdalar.

Ziyoratchilar muqaddas Haj amallarini bajarish uchun yaratib berilayotgan qulay sharoitlardan mamnun ekanliklarini izhor etib, yurtimiz tinchligi va ravnaqini so‘rab duo qilmoqdalar.

Madina ziyoratini tugatgan o‘zbekistonlik hojilar haj amallarini bajarish uchun Makkai Mukarramaga jo‘nab ketdilar.