Шайх Муҳаммад Содиқ Муҳаммад Юсуф раҳимаҳуллоҳнинг «Тафсири ҳилол» китоби қайта нашр этилди

Рукн: Янгиликлар Чоп этилган: 26.05.2016

Тошкент шаҳридаги «Ҳилолнашр» нашриёт уйида Шайх Муҳаммад Содиқ Муҳаммад Юсуф раҳимаҳуллоҳ қаламига мансуб олти жилдлик «Тафсири Ҳилол»нинг иккинчи нашри чоп этилганлиги муносабати билан тақдимот маросими бўлиб ўтди.

«Тафсири Ҳилол» — бутун оламга мударрис бўлган буюк уламолар юрти — Мовароуннаҳр диёрида ёзилган энг янги тафсирдир. Замонамизнинг забардаст олимларидан бири шайх Муҳаммад Содиқ Муҳаммад Юсуф ҳазратларининг ушбу тафсири ўзининг содда ва равон тили, теран ва дақиқ услуби билан ажралиб турувчи шоҳ асардир. «Тафсири Ҳилол» мўътабар тафсирларнинг анъаналарига содиқ қолган ҳолда, бугунги кун китобхонининг савияси, дунёқараши ва эҳтитёжларини ҳам ҳисобга олиб ёзилган бўлиб, ўқувчини Қуръони карим маъноларининг битмас-туганмас ҳикматларига ошно этади.

Маросимда сўзга чиққан Ўзбекистон мусулмонлари идораси Фатво бўлими мудири Абдулҳамид Турсунов янги нашр муносабати билан ЎМИ ва муфтий Усмонхон Алимов табригини етказди. Ҳасанхон Яҳё Абдулмажид диёримизда тафсир илмларининг ривожланиш тарихи ва ўзбекча тафсирлар ҳақида маъруза қилди. Шайх Муҳаммад Содиқ Муҳаммад Юсуф ҳазратларининг ўғли Исмоилхон Муҳаммад Юсуф эса «Тафсири Ҳилол»нинг ёзилиш жараёни ҳақида устознинг яқинлари хотиралари билан таништирди. Ҳазратнинг укаси Муҳаммад Амин Муҳаммад Юсуф, «Ҳазрати Али» жоме масжиди имом-хатиби Салоҳиддин Шарипов «Тафсири Ҳилол» китоби ҳақидаги хотиралар ва мулоҳазаларини баён қилдилар.

Тадбир сўнггида «Тафсири Ҳилол»нинг янги нашрини чоп этишда жонбозлик кўрсатган нашриёт уйи ходимлари тақдирланди.

Ушбу тўпламни фақатгина «Ҳилолнашр» нашриёт уйи дўконларидан харид қилиш мумкин.

* * *

Toshkent shahridagi «Hilolnashr» nashriyot uyida Shayx Muhammad Sodiq Muhammad Yusuf rahimahulloh qalamiga mansub olti jildlik «Tafsiri Hilol»ning ikkinchi nashri chop etilganligi munosabati bilan taqdimot marosimi bo‘lib o‘tdi.

«Tafsiri Hilol» — butun olamga mudarris bo‘lgan buyuk ulamolar yurti — Movarounnahr diyorida yozilgan eng yangi tafsirdir. Zamonamizning zabardast olimlaridan biri shayx Muhammad Sodiq Muhammad Yusuf hazratlarining ushbu tafsiri o‘zining sodda va ravon tili, teran va daqiq uslubi bilan ajralib turuvchi shoh asardir. «Tafsiri Hilol» mo‘‘tabar tafsirlarning an’analariga sodiq qolgan holda, bugungi kun kitobxonining saviyasi, dunyoqarashi va ehtityojlarini ham hisobga olib yozilgan bo‘lib, o‘quvchini Qur’oni karim ma’nolarining bitmas-tuganmas hikmatlariga oshno etadi.

Marosimda so‘zga chiqqan O‘zbekiston musulmonlari idorasi Fatvo bo‘limi mudiri Abdulhamid Tursunov yangi nashr munosabati bilan O‘MI va muftiy Usmonxon Alimov tabrigini yetkazdi. Hasanxon Yahyo Abdulmajid diyorimizda tafsir ilmlarining rivojlanish tarixi va o‘zbekcha tafsirlar haqida ma’ruza qildi. Shayx Muhammad Sodiq Muhammad Yusuf hazratlarining o‘g‘li Ismoilxon Muhammad Yusuf esa «Tafsiri Hilol»ning yozilish jarayoni haqida ustozning yaqinlari xotiralari bilan tanishtirdi. Hazratning ukasi Muhammad Amin Muhammad Yusuf, «Hazrati Ali» jome masjidi imom-xatibi Salohiddin Sharipov «Tafsiri Hilol» kitobi haqidagi xotiralar va mulohazalarini bayon qildilar.

Tadbir so‘nggida «Tafsiri Hilol»ning yangi nashrini chop etishda jonbozlik ko‘rsatgan nashriyot uyi xodimlari taqdirlandi.

Ushbu to‘plamni faqatgina «Hilolnashr» nashriyot uyi do‘konlaridan xarid qilish mumkin.