Ўзбекистонлик қорилар халқаро Қуръони карим мусобақасида иштирок этишди

Шу йилнинг 13-20 апрель кунлари Кувайт шаҳрида VII Халқаро Қуръони карим мусобақаси бўлиб ўтди. Юртимизнинг 2 нафар вакили – Имом Бухорий номли Тошкент ислом институти талабаси Муҳаммадяҳё Маҳмудов ва “Мир-Араб” ислом билим юрти талабаси Мираббос Мирбобоев мазкур мусобақада иштирок этдилар, дея хабар беради Ўзбекистон мусулмонлари идораси Халқаро алоқалар бўлими.

Мазкур мусобақада дунёдаги 60 давлатдан келган 100 дан ортиқ кучли Қуръон ҳофизлари иштирок этишди. Муҳаммадяҳё Маҳмудов Қуръони каримни тажвид қоидаси билан тўлиқ ёддан ўқиш йўналиши бўйича, Мираббос Мирбобоев Қуръони каримни тажвид қоидалари билан тиловат қилиб бериш йўналишида қатнашди.

Мусобақа давомида Қуръони каримни етти хил қироатда ёддан ўқиш мусобақасида 1-ўринни Ливан, 2-ўринни Чад, 3-ўринни Сомали, Қуръони каримни тажвид қоидаси билан ёддан ўқиш мусобақасида 1-ўринни Ливия, 2-ўринни Саудия Арабистони, 3-ўринни АҚШ, Қуръони каримни тажвид қоидаси билан тиловот қилиб бериш мусобақасида эса 1-ўринни Малайзия, 2-ўринни Жазоир, 3-ўринни Эрон вакиллари эгалладилар.

Мусобақа якунлангандан кейин амирлик қасрида Кувайт давлати амири ноиби Шайх Наввоф ал-Аҳмад ал-Жобир ас-Сабоҳ мусобақа ғолибларини тақдирлади. Қолган иштирокчилар қатори вакилларимизга ҳам мусобақадаги муносиб иштироки тўғрисидаги ташаккурнома ёрлиғи тақдим этилди.

* * *

Shu yilning 13-20 aprel kunlari Kuvayt shahrida VII Xalqaro Qur’oni karim musobaqasi bo‘lib o‘tdi. Yurtimizning 2 nafar vakili – Imom Buxoriy nomli Toshkent islom instituti talabasi Muhammadyahyo Mahmudov va “Mir-Arab” islom bilim yurti talabasi Mirabbos Mirboboev mazkur musobaqada ishtirok etdilar, deya xabar beradi O‘zbekiston musulmonlari idorasi Xalqaro aloqalar bo‘limi.

Mazkur musobaqada dunyodagi 60 davlatdan kelgan 100 dan ortiq kuchli Qur’on hofizlari ishtirok etishdi. Muhammadyahyo Mahmudov Qur’oni karimni tajvid qoidasi bilan to‘liq yoddan o‘qish yo‘nalishi bo‘yicha, Mirabbos Mirboboev Qur’oni karimni tajvid qoidalari bilan tilovat qilib berish yo‘nalishida qatnashdi.

Musobaqa davomida Qur’oni karimni yetti xil qiroatda yoddan o‘qish musobaqasida 1-o‘rinni Livan, 2-o‘rinni Chad, 3-o‘rinni Somali, Qur’oni karimni tajvid qoidasi bilan yoddan o‘qish musobaqasida 1-o‘rinni Liviya, 2-o‘rinni Saudiya Arabistoni, 3-o‘rinni AQSh, Qur’oni karimni tajvid qoidasi bilan tilovot qilib berish musobaqasida esa 1-o‘rinni Malayziya, 2-o‘rinni Jazoir, 3-o‘rinni Eron vakillari egalladilar.

Musobaqa yakunlangandan keyin amirlik qasrida Kuvayt davlati amiri noibi Shayx Navvof al-Ahmad al-Jobir as-Saboh musobaqa g‘oliblarini taqdirladi. Qolgan ishtirokchilar qatori vakillarimizga ham musobaqadagi munosib ishtiroki to‘g‘risidagi tashakkurnoma yorlig‘i taqdim etildi.

• Олдинги
• Кейинги