Москва жомеъ масжидида Қуръон Фестивали бўлиб ўтади

Рукн: Янгиликлар Чоп этилган: 22.03.2016

27 март куни соат 10.00 да Москва жомеъ масжидида Қуръон Фестивали очилади. Бу ҳақда Москва мусулмонлари идораси матбуот хизматига асосланиб “Таянч” мигрантлар портали хабар қилмоқда.

Масжидда очиқ эшиклар куни эълон қилинган, унга 10 мингдан зиёд меҳмонлар келиши кутилмоқда. Масжид турли миллат ва динлар вакиллари, турли ёшдаги инсонлар учун маърифат, аҳиллик ва ҳамжиҳатлик майдони бўлиб келмоқда.

Мазкур тадбирда Пайғамбаримиз Муҳаммад (с.а.в.)нинг масжидда сақланаётган муборак сочлари намойиш этилади.

3000 кв.м. дан зиёд майдонда бадиий кўргазмалар, анъанавий ва замонавий услубдаги Қуръон хаттотлиги, “Қуръондан илҳомланганлар” китоблар кўргазмаси бўлиб ўтади. Шунингдек, дастурга “Соатлик намоз” семинар ва хаттотлик бўйича мастер-класслари киритилган.

Фестивал доирасида “Қуръон мўъжизалари ҳақида” талабалар конференцияси ўтказилади. Хитой Ислом Институтида 10 йилдан ортиқ араб хаттотлигидан дарс берувчи Абу Бакр Ма Вейвей мазкур санъат сирлари билан бўлишади.

Қуръон Фестивалига фахрий меҳмон сифатида қоҳиралик олим Яҳё Хасан Вазирий таклиф этилган. Олимнинг Қуръон илмий феномени бўйича Бутунжаҳон қўмитасига киритилган мавзусига бағишланган ваъзлари тақдим этилади.

Ташкилотчилар илк бор Муқаддас Қуръон ёш ҳофизлари Умумроссия танловида иштирокчиларини саралайди. Мазкур танловда якшанба мактаблари ва мусулмонлар жамоалари ўқувчилари орасидаги 14 ёшгача бўлган болалар иштирок этишган.

Тадбир давомида “Масжидлар – Аллоҳнинг эҳромлари” Х-Умумроссия шеърият танлови совриндорларининг тантанали тақдирлаш маросими ўтказилади.

Москва Жомеъ масжиди Очиқ эшиклар куни кечки соат 22.00 га қадар давом этади ва моҳир ҳофизларнинг қироатлари билан якунланади.

* * *

27 mart kuni soat 10.00 da Moskva jome’ masjidida Qur’on Festivali ochiladi. Bu haqda Moskva musulmonlari idorasi matbuot xizmatiga asoslanib “Tayanch” migrantlar portali xabar qilmoqda.

Masjidda ochiq eshiklar kuni e’lon qilingan, unga 10 mingdan ziyod mehmonlar kelishi kutilmoqda. Masjid turli millat va dinlar vakillari, turli yoshdagi insonlar uchun ma’rifat, ahillik va hamjihatlik maydoni bo‘lib kelmoqda.

Mazkur tadbirda Payg‘ambarimiz Muhammad (s.a.v.)ning masjidda saqlanayotgan muborak sochlari namoyish etiladi.

3000 kv.m. dan ziyod maydonda badiiy ko‘rgazmalar, an’anaviy va zamonaviy uslubdagi Qur’on xattotligi, “Qur’ondan ilhomlanganlar” kitoblar ko‘rgazmasi bo‘lib o‘tadi. Shuningdek, dasturga “Soatlik namoz” seminar va xattotlik bo‘yicha master-klasslari kiritilgan.

Festival doirasida “Qur’on mo‘‘jizalari haqida” talabalar konferentsiyasi o‘tkaziladi. Xitoy Islom Institutida 10 yildan ortiq arab xattotligidan dars beruvchi Abu Bakr Ma Veyvey mazkur san’at sirlari bilan bo‘lishadi.

Qur’on Festivaliga faxriy mehmon sifatida qohiralik olim Yahyo Xasan Vaziriy taklif etilgan. Olimning Qur’on ilmiy fenomeni bo‘yicha Butunjahon qo‘mitasiga kiritilgan mavzusiga bag‘ishlangan va’zlari taqdim etiladi.

Tashkilotchilar ilk bor Muqaddas Qur’on yosh hofizlari Umumrossiya tanlovida ishtirokchilarini saralaydi. Mazkur tanlovda yakshanba maktablari va musulmonlar jamoalari o‘quvchilari orasidagi 14 yoshgacha bo‘lgan bolalar ishtirok etishgan.

Tadbir davomida “Masjidlar – Allohning ehromlari” X-Umumrossiya she’riyat tanlovi sovrindorlarining tantanali taqdirlash marosimi o‘tkaziladi.

Moskva Jome’ masjidi Ochiq eshiklar kuni kechki soat 22.00 ga qadar davom etadi va mohir hofizlarning qiroatlari bilan yakunlanadi.