Файзли Рамазон шукуҳи

Муборак рамазон ойининг фазилатли кечаларидан бири. Рўзадорлар аллақачон ифторлик қилиб, фақатгина рамазон ойига хос тунги ибодат – таровеҳ намозини адо этиш учун масжидларга ошиқмоқда. Шу кунларда жомеъларда бирин-кетин хатми Қуръон якунланмоқда. Пайғамбаримизнинг (с.а.в.) Қуръон хатми якунлангандан кейинги дуолар ижобат бўлиши ҳақидаги ҳадисларига уйғун ҳолда намозхонлар “бугун қайси масжидда хатми Қуръон якунланар экан?” дея сўраб, ўша масжидга шошадилар.

Хориждаги ватандошларимизга юртимизда кечаётган рамазон шукуҳини улашиш мақсадида Тошкент шаҳридаги жомеъ масжидларига йўл олдик. Пойтахтимиздаги “Ракат” жомеъ масжидида ҳам ҳар йилгидек Қуръони карим хатмонаси кўтаринки кайфиятда ўтказилди. Масжид имом-хатиби Раббимқул Муҳаммадиэв:
— Алҳамдулиллаҳ, Рамазонни шарифнинг 2-ўн кунлиги ибодатларини ҳам якунлаш арафасида турибмиз. Бу йил ҳайит байрами билан истиқлол айёмининг бирга нишонлаяпмиз. Ҳисоб-китобларга кўра, бундай фурсат ўттиз йилда бир келар экан.

Ўзбекистон мусулмонлари идораси раиси, муфтий Усмонхон Алимовнинг шукуҳли кунларда масжидимизга ташриф буюриб, мурувват ойи рамазонда ифторликларни катта-катта ресторанларда дабдабали суратда эмас, балки ихчам тарзда ўтказиш, хайр-эҳсонларни кам таъминланган оилалар ва меҳрибонлик уйларига тарқатиш мақсадга мувофиқ бўлиши, ҳақиқий муҳтожларга кўрсатилган эҳсон ва марҳаматларгина Аллоҳ ҳузурида мақбуллигига далолат қилувчи оят ва ҳадислар бисёр эканини таъкидладилар.

Бугун масжидимизда ҳам Қуръони карим хатми ўз поёнига етадиган кун. Дуолар даргоҳи илоҳийда ижобат бўладиган ушбу онлар барчамизга муборак бўлсин!
Намозхонлардан Мираҳмад ҳожи ота:
— Советлар даврида бугунгидек кенг, ёруғ ва муҳташам масжидлар қаёқда, дейсиз.. Таровеҳ намозларини қўя туринг, ҳатто ҳайит намозларини ҳам мозорларда беркиниб ўқиган кунларимиз бўлган. Ҳозир биргина Тошкент шаҳрида юздан ортиқ масжид бор. Бу кунларга етиш кўпчиликка насиб этмади. Мустабид тузум тузини тотган одам сифатида шуни айтаманки, бу кунларнинг қадрини ҳеч нарса билан тенглаб бўлмайди!

Тошкент шаҳридаги “Хўжа Аламбардор” жомеъ масжидининг кўҳна хонақосини таъмирлаш ишлари бундан икки йил олдин бошланган эди. Файзли Рамазон кунларида қурилиш ва таъмирлаш ишлари якунига етди. Масжид имом-хатиби Раҳматуллоҳ Сайфуддинов: — Мана, улуғ ойнинг иккинчи ўн кунлиги – мағфират даҳасини ҳам ибодатда ўтказмоқдамиз. Ушбу ўн кунликда рўзадорларнинг гуноҳлари кечирилиши тўғрисида кўпгина ҳадислар ворид бўлган. Гуноҳлардан покланган қалб эса эзгуликка тўлади. Эзгуликка лиммо-лим диллардан тўкилган дуолар бешак ижобат бўлгай, иншааллоҳ!

Нуъмон Отабоев

* * *

Muborak ramazon oyining fazilatli kechalaridan biri. Ro‘zadorlar allaqachon iftorlik qilib, faqatgina ramazon oyiga xos tungi ibodat – taroveh namozini ado etish uchun masjidlarga oshiqmoqda. Shu kunlarda jome’larda birin-ketin xatmi Qur’on yakunlanmoqda. Payg‘ambarimizning (s.a.v.) Qur’on xatmi yakunlangandan keyingi duolar ijobat bo‘lishi haqidagi hadislariga uyg‘un holda namozxonlar “bugun qaysi masjidda xatmi Qur’on yakunlanar ekan?” deya so‘rab, o‘sha masjidga shoshadilar.

Xorijdagi vatandoshlarimizga yurtimizda kechayotgan ramazon shukuhini ulashish maqsadida Toshkent shahridagi jome’ masjidlariga yo‘l oldik. Poytaxtimizdagi “Rakat” jome’ masjidida ham har yilgidek Qur’oni karim xatmonasi ko‘tarinki kayfiyatda o‘tkazildi. Masjid imom-xatibi Rabbimqul Muhammadiev:
— Alhamdulillah, Ramazonni sharifning 2-o‘n kunligi ibodatlarini ham yakunlash arafasida turibmiz. Bu yil hayit bayrami bilan istiqlol ayyomining birga nishonlayapmiz. Hisob-kitoblarga ko‘ra, bunday fursat o‘ttiz yilda bir kelar ekan.

O’zbekiston musulmonlari idorasi raisi, muftiy Usmonxon Alimovning shukuhli kunlarda masjidimizga tashrif buyurib, muruvvat oyi ramazonda iftorliklarni katta-katta restoranlarda dabdabali suratda emas, balki ixcham tarzda o‘tkazish, xayr-ehsonlarni kam ta’minlangan oilalar va mehribonlik uylariga tarqatish maqsadga muvofiq bo‘lishi, haqiqiy muhtojlarga ko‘rsatilgan ehson va marhamatlargina Alloh huzurida maqbulligiga dalolat qiluvchi oyat va hadislar bisyor ekanini ta’kidladilar.

Bugun masjidimizda ham Qur’oni karim xatmi o‘z poyoniga yetadigan kun. Duolar dargohi ilohiyda ijobat bo‘ladigan ushbu onlar barchamizga muborak bo‘lsin!
Namozxonlardan Mirahmad hoji ota:
— Sovetlar davrida bugungidek keng, yorug‘ va muhtasham masjidlar qayoqda, deysiz.. Taroveh namozlarini qo‘ya turing, hatto hayit namozlarini ham mozorlarda berkinib o‘qigan kunlarimiz bo‘lgan. Hozir birgina Toshkent shahrida yuzdan ortiq masjid bor. Bu kunlarga yetish ko‘pchilikka nasib etmadi. Mustabid tuzum tuzini totgan odam sifatida shuni aytamanki, bu kunlarning qadrini hech narsa bilan tenglab bo‘lmaydi!

Toshkent shahridagi “Xo‘ja Alambardor” jome’ masjidining ko‘hna xonaqosini ta’mirlash ishlari bundan ikki yil oldin boshlangan edi. Fayzli Ramazon kunlarida qurilish va ta’mirlash ishlari yakuniga yetdi. Masjid imom-xatibi Rahmatulloh Sayfuddinov: — Mana, ulug‘ oyning ikkinchi o‘n kunligi – mag‘firat dahasini ham ibodatda o‘tkazmoqdamiz. Ushbu o‘n kunlikda ro‘zadorlarning gunohlari kechirilishi to‘g‘risida ko‘pgina hadislar vorid bo‘lgan. Gunohlardan poklangan qalb esa ezgulikka to‘ladi. Ezgulikka limmo-lim dillardan to‘kilgan duolar beshak ijobat bo‘lgay, inshaalloh!

Nu’mon Otaboyev

• Олдинги