“Умра-2016” баҳор мавсуми бошланди

Рукн: Янгиликлар Чоп этилган: 15.02.2016

2016 йил 15 февраль куни эрта тонгда Тошкент шаҳри ва Тошкент вилояти зиёратчиларидан иборат дастлабки гуруҳлар умра ибодатини адо этиш учун Саудия Арабистонига жўнаб кетишди, дея хабар беради Ўзбекистон мусулмонлари идораси халқаро алоқалар бўлими.

Республика “Ҳаж” ва “Умра” тадбирларини ташкил этиш ва ўтказиш масалалари бўйича Жамоатчилик кенгаши тавсиялари билан ташкил этилган мазкур мавсум давомида 5500 нафар фуқароларимизнинг умра зиёратига бориши режалаштирилган.

Бу мавсум давомида зиёратчиларимизга Саудия Арабистонида 8 нафар ишчи гуруҳи, 8 нафар ошпазлар ва 27 нафар шифокорлар гуруҳи хизмат кўрсатади.

Ўн кунлик умра сафари давомида зиёратчиларимиз Мадина шаҳрида 3 кун бўлиб, “Нур Мавадда” меҳмонхонасида истиқомат қилишлари режалаштирилган. Макка шаҳрида эса “Намаа Мавадда” меҳмонхонаси зиёратчиларимизни кутиб олишга шай ҳолатга келтирилган бўлиб, умрачиларимиз у ерда 7 кун давомида бўладилар.

Умра зиёратига тайёргарлик доирасида барча зиёратчилар мавсумий касалликларга қарши эмланиб, давлатимиз рамзи туширилган камзул ва сумкалар билан таъминландилар. Сафар олдидан уларга умра сафарининг моҳияти, уни адо этишга доир масалалар гуруҳ раҳбарлари томонидан тушунтирилди.

Умра зиёратчиларини Тошкент халқаро аэропортида Дин ишлари бўйича қўмита ҳамда Ўзбекистон мусулмонлари идораси масъуллари мутасадди ташкилотлар билан ҳамкорликда кузатдилар.

Ўзбекистон мусулмонлари идораси ва “Ўзбекистон ҳаво йўллари” МАК ўртасидаги келишувга кўра, “Умра-2016” баҳор мавсуми зиёратчиларини кузатиш 15 февралдан 26 мартга қадар давом этади.

* * *

2016 yil 15 fevral kuni erta tongda Toshkent shahri va Toshkent viloyati ziyoratchilaridan iborat dastlabki guruhlar umra ibodatini ado etish uchun Saudiya Arabistoniga jo‘nab ketishdi, deya xabar beradi O‘zbekiston musulmonlari idorasi xalqaro aloqalar bo‘limi.

Respublika “Haj” va “Umra” tadbirlarini tashkil etish va o‘tkazish masalalari bo‘yicha Jamoatchilik kengashi tavsiyalari bilan tashkil etilgan mazkur mavsum davomida 5500 nafar fuqarolarimizning umra ziyoratiga borishi rejalashtirilgan.

Bu mavsum davomida ziyoratchilarimizga Saudiya Arabistonida 8 nafar ishchi guruhi, 8 nafar oshpazlar va 27 nafar shifokorlar guruhi xizmat ko‘rsatadi.

O‘n kunlik umra safari davomida ziyoratchilarimiz Madina shahrida 3 kun bo‘lib, “Nur Mavadda” mehmonxonasida istiqomat qilishlari rejalashtirilgan. Makka shahrida esa “Namaa Mavadda” mehmonxonasi ziyoratchilarimizni kutib olishga shay holatga keltirilgan bo‘lib, umrachilarimiz u yerda 7 kun davomida bo‘ladilar.

Umra ziyoratiga tayyorgarlik doirasida barcha ziyoratchilar mavsumiy kasalliklarga qarshi emlanib, davlatimiz ramzi tushirilgan kamzul va sumkalar bilan ta’minlandilar. Safar oldidan ularga umra safarining mohiyati, uni ado etishga doir masalalar guruh rahbarlari tomonidan tushuntirildi.

Umra ziyoratchilarini Toshkent xalqaro aeroportida Din ishlari bo‘yicha qo‘mita hamda O‘zbekiston musulmonlari idorasi mas’ullari mutasaddi tashkilotlar bilan hamkorlikda kuzatdilar.

O‘zbekiston musulmonlari idorasi va “O‘zbekiston havo yo‘llari” MAK o‘rtasidagi kelishuvga ko‘ra, “Umra-2016” bahor mavsumi ziyoratchilarini kuzatish 15 fevraldan 26 martga qadar davom etadi.