Қуръони карим Расулуллоҳ (с.а.в.) хусусларида

Аллоҳ таолонинг икки дунё саодатига эришмоғимиз учун берган буйруқлари ва қайтариқларини ўзида жамлаган, йўл кўрсатувчи Китоб бўлган Қуръони карим бизга Пайғамбаримиз (с.а.в.)ни танитади. У зот (с.а.в.)нинг хусусиятлари ҳақида хабар беради. Қуръони карим оятларидан бу хусусда қуйидагиларни билиб оламиз:

1. Ҳазрати Муҳаммад (с.а.в.) энг сўнгги Расул ва Набийдирлар.

“Муҳаммад сизларнинг эркакларингиздан бирортасининг отаси эмасдир, балки у Аллоҳнинг элчиси ва пайғамбарларнинг муҳридир...” (Аҳзоб, 40).

(Изоҳ: Бу ерда Аллоҳ таоло Муҳаммад (а.с.)ни “Пайғамбарларнинг муҳри”, деб атаган. Зеро, ҳар бир муҳим ёзма иш сўнгида муҳр босилгани каби Пайғамбаримиз (с.а.в.) ҳам охирги пайғамбар бўлганлари ва эндиликда то қиёматгача бош-қа пайғамбар келмаслиги аниқ бўлгани учун пайғамбарлар китобига муҳр босилгандек бўлди.)

2. Ҳазрати Муҳаммад (с.а.в.) бутун инсониятга Пайғамбардирлар.

“(Эй, Муҳаммад,) Биз Сизни, ҳақиқатан, барча одамларга хушхабар берувчи ва огоҳлантирувчи бўлган ҳолингизда, (пайғамбар қилиб) юбордик!..” (Сабаъ, 28);

3. Ҳазрати Муҳаммад (с.а.в.) хушхабар берувчи ва огоҳлантирувчидирлар.

“Албатта, Биз Сизни ҳақ (дин) билан, хушхабар берувчи ва огоҳлантирувчи қилиб юбордик...” (Фотир, 24);

Бу хусусиятлар барча пайғамбарларга оид бўлса-да, Пайғамбаримиз (с.а.в.)нинг огоҳлантирувчиликлари аввалгилардан фарқли равишда маълум бир қавмга эмас, бутун инсониятга хос эканлиги билан аҳамиятлидир.

4. Ҳазрати Муҳаммад (с.а.в.) энг гўзал ўрнакдирлар.

“(Эй, имон келтирганлар,) сизлар учун – Аллоҳ ва охират кунидан умидвор бўлган ҳамда Аллоҳни кўп ёд қилган кишилар учун Аллоҳнинг пайғамбарида гўзал намуна бордир” (Аҳзоб, 21).

5. Ҳазрати Муҳаммад (с.а.в.) эслатувчи (ўгит берувчи)дирлар.

“Бас, (эй, Муҳаммад,) эслатинг! Зотан, Сиз фақат эслатувчидирсиз. Уларнинг устидан зўравонлик билан ҳукм юргизувчи эмассиз” (Ғошия, 21-22).

6. Ҳазрати Муҳаммад (с.а.в.) ҳақ даъватчи ва борлиқни чароғон қилувчи чироқдирлар.

“Эй, Пайғамбар, дарҳақиқат, Биз Сизни (қиёматда барча умматларга) гувоҳ бўлувчи, (жаннат ҳақида) хушхабар берувчи ва (дўзах азобидан) огоҳлантирувчи этиб юбордик. Аллоҳнинг изни билан Унга (динига) даъват қилувчи ва (йўл кўрсатувчи) нурли чироқ қилиб ҳам” (Аҳзоб, 45-46).

7. Ҳазрати Муҳаммад йўл кўрсатувчидирлар.

“...Албатта, Сиз (ваҳий ёрдамида) Тўғри йўлга бошлайсиз” (Шўро, 52).

8. Ҳазрати Муҳаммад буюк ахлоқ соҳибидирлар.

“Албатта, Сиз буюк хулқ узрадирсиз!” (Қалам, 4).

9. Ҳазрати Муҳаммад марҳаматли, раҳмдил ва умматга нисбатан жуда мушфиқ эдилар.

“Ҳақиқатан, сизларга ўзларингиздан (чиққан), сизларнинг қийинчиликларингиздан алам чекадиган, сизлар билан қизиқувчи ва мўминларга мушфиқ ва раҳмдил Расул келгандир” (Тавба, 128).

10. Ҳазрати Муҳаммад юмшоқ, мулойим қалбли эдилар.

“Аллоҳнинг раҳмати сабабли (Сиз, эй, Муҳаммад,) уларга (саҳобаларга) мулойим бўлдингиз. Агар дағал, тошбағир бўлганингизда, албатта, (улар) атрофингиздан тарқалиб кетган бўлур эдилар. Бас, уларни афв этинг, (гуноҳлари учун) кечирим сўранг ва улар билан кенгашиб иш қилинг!..” (Оли Имрон, 159).

“Ирфон” тақвимининг 2010 йил, 2-сонидан олинди.

* * *

Alloh taoloning ikki dunyo saodatiga erishmog‘imiz uchun bergan buyruqlari va qaytariqlarini o‘zida jamlagan, yo‘l ko‘rsatuvchi Kitob bo‘lgan Qur’oni karim bizga Payg‘ambarimiz (s.a.v.)ni tanitadi. U zot (s.a.v.)ning xususiyatlari haqida xabar beradi. Qur’oni karim oyatlaridan bu xususda quyidagilarni bilib olamiz:

1. Hazrati Muhammad (s.a.v.) eng so‘nggi Rasul va Nabiydirlar.

“Muhammad sizlarning erkaklaringizdan birortasining otasi emasdir, balki u Allohning elchisi va payg‘ambarlarning muhridir...” (Ahzob, 40).

(Izoh: Bu yerda Alloh taolo Muhammad (a.s.)ni “Payg‘ambarlarning muhri”, deb atagan. Zero, har bir muhim yozma ish so‘ngida muhr bosilgani kabi Payg‘ambarimiz (s.a.v.) ham oxirgi payg‘ambar bo‘lganlari va endilikda to qiyomatgacha bosh-qa payg‘ambar kelmasligi aniq bo‘lgani uchun payg‘ambarlar kitobiga muhr bosilgandek bo‘ldi.)

2. Hazrati Muhammad (s.a.v.) butun insoniyatga Payg‘ambardirlar.

“(Ey, Muhammad,) Biz Sizni, haqiqatan, barcha odamlarga xushxabar beruvchi va ogohlantiruvchi bo‘lgan holingizda, (payg‘ambar qilib) yubordik!..” (Saba’, 28);

3. Hazrati Muhammad (s.a.v.) xushxabar beruvchi va ogohlantiruvchidirlar.

“Albatta, Biz Sizni haq (din) bilan, xushxabar beruvchi va ogohlantiruvchi qilib yubordik...” (Fotir, 24);

Bu xususiyatlar barcha payg‘ambarlarga oid bo‘lsa-da, Payg‘ambarimiz (s.a.v.)ning ogohlantiruvchiliklari avvalgilardan farqli ravishda ma’lum bir qavmga emas, butun insoniyatga xos ekanligi bilan ahamiyatlidir.

4. Hazrati Muhammad (s.a.v.) eng go‘zal o‘rnakdirlar.

“(Ey, imon keltirganlar,) sizlar uchun – Alloh va oxirat kunidan umidvor bo‘lgan hamda Allohni ko‘p yod qilgan kishilar uchun Allohning payg‘ambarida go‘zal namuna bordir” (Ahzob, 21).

5. Hazrati Muhammad (s.a.v.) eslatuvchi (o‘git beruvchi)dirlar.

“Bas, (ey, Muhammad,) eslating! Zotan, Siz faqat eslatuvchidirsiz. Ularning ustidan zo‘ravonlik bilan hukm yurgizuvchi emassiz” (G‘oshiya, 21-22).

6. Hazrati Muhammad (s.a.v.) haq da’vatchi va borliqni charog‘on qiluvchi chiroqdirlar.

“Ey, Payg‘ambar, darhaqiqat, Biz Sizni (qiyomatda barcha ummatlarga) guvoh bo‘luvchi, (jannat haqida) xushxabar beruvchi va (do‘zax azobidan) ogohlantiruvchi etib yubordik. Allohning izni bilan Unga (diniga) da’vat qiluvchi va (yo‘l ko‘rsatuvchi) nurli chiroq qilib ham” (Ahzob, 45-46).

7. Hazrati Muhammad yo‘l ko‘rsatuvchidirlar.

“...Albatta, Siz (vahiy yordamida) To‘g‘ri yo‘lga boshlaysiz” (Sho‘ro, 52).

8. Hazrati Muhammad buyuk axloq sohibidirlar.

“Albatta, Siz buyuk xulq uzradirsiz!” (Qalam, 4).

9. Hazrati Muhammad marhamatli, rahmdil va ummatga nisbatan juda mushfiq edilar.

“Haqiqatan, sizlarga o‘zlaringizdan (chiqqan), sizlarning qiyinchiliklaringizdan alam chekadigan, sizlar bilan qiziquvchi va mo‘minlarga mushfiq va rahmdil Rasul kelgandir” (Tavba, 128).

10. Hazrati Muhammad yumshoq, muloyim qalbli edilar.

“Allohning rahmati sababli (Siz, ey, Muhammad,) ularga (sahobalarga) muloyim bo‘ldingiz. Agar dag‘al, toshbag‘ir bo‘lganingizda, albatta, (ular) atrofingizdan tarqalib ketgan bo‘lur edilar. Bas, ularni afv eting, (gunohlari uchun) kechirim so‘rang va ular bilan kengashib ish qiling!..” (Oli Imron, 159).

“Irfon” taqvimining 2010 yil, 2-sonidan olindi.

• Олдинги
• Кейинги