Салмо бинти Қайс

Расулуллоҳнинг (соллаллоҳу алайҳи ва саллам) Мадинага ташрифлари билан ансорлар шарафга эришди. Бу улуғ зотлар Пайғамбаримизни (алайҳиссалом) меҳмон қилиш учун ўзаро мусобақалашардилар. Расулуллоҳ (соллаллоҳу алайҳи ва саллам) ансорлар ва уларнинг уйини мақтаб бундай дедилар: “Ансор хонадонининг энг яхшиси Бану Нажжор, сўнг Бану Абдулашҳал, Бану Хорис ва БануХазраж, сўнг Бану Соидадир. Ансорларнинг ҳар бир хонадонида хайр бордир”.

Тўлиқ исми: Салмо бинти Қайс ибн Амр ибн Убайда ибн Молик ибн Ади ибн Омир ибн Ғанам ибн Ади ибн Нажжор. Куняси: Умму Мунзир.

Таниқли саҳобия Салмо (розияллоҳу анҳо) Расулуллоҳга (соллаллоҳу алайҳи ва саллам) оталари тарафидан хола бўлади.

Салмо бинти Қайс (розияллоҳу анҳо) уйидаги янги пишган ва қуритилган хурмолари билан мадиналикларни меҳмон қилиши туфайли шуҳрат қозонган эди. Расулуллоҳ (соллаллоҳу алайҳи ва саллам) ҳам унинг уйига тез-тез келиб, унинг таомларини баракали ва фойдали, деб мақтардилар. Салмо (розияллоҳу анҳо) айтади: "Расулуллоҳ (соллаллоҳу алайҳи ва саллам) меникига Али (розияллоҳу анҳу) билан келдилар. У бетоб эди. Сўрида узумим бўлиб, Пайғамбаримиз (алайҳиссалом) ва Али (розияллоҳу анҳу) ундан ея бошлашди. Шунда Расулуллоҳ (соллаллоҳу алайҳи ва саллам):"Эй Али, бўлди қил. Сенга мумкин эмас", дедилар. Али (розияллоҳу анҳу) қайтиб, жойига ўтирди. Мен қандлавлаги ва арпани пишириб, Пайғамбаримиз (алайҳиссалом) олдиларига қўйдим. У зот (алайҳиссалом) Алига (розияллоҳу анҳу): "Мана бундан егин, сенга фойдали", дедилар (Имом Термизий).

Шунингдек, Умму Мунзир (розияллоҳу анҳо) жума куни қанд лавлаги ва арпадан таом тайёрлаб, саҳобаларни меҳмон қиларди. Саҳл (розияллоҳу анҳу) айтади: "Жума намозидан сўнг унинг уйига бориб, салом берардик. У олдимизга овқат қўярди". Овқатида ёғ бўлмаса ҳам, жума куни бўлгани учун қувонардик".

Пўлатхон Каттаев,

Тошкент Ислом институти ўқитувчиси

Rasulullohning (sollallohu alayhi va sallam) Madinaga tashriflari bilan ansorlar sharafga erishdi. Bu ulug‘ zotlar Payg‘ambarimizni (alayhissalom) mehmon qilish uchun o‘zaro musobaqalashardilar. Rasululloh (sollallohu alayhi va sallam) ansorlar va ularning uyini maqtab bunday dedilar: “Ansor xonadonining eng yaxshisi Banu Najjor, so‘ng Banu Abdulashhal, Banu Xoris va BanuXazraj, so‘ng Banu Soidadir. Ansorlarning har bir xonadonida xayr bordir”.

To‘liq ismi: Salmo binti Qays ibn Amr ibn Ubayda ibn Molik ibn Adi ibn Omir ibn G‘anam ibn Adi ibn Najjor. Kunyasi: Ummu Munzir.

Taniqli sahobiya Salmo (roziyallohu anho) Rasulullohga (sollallohu alayhi va sallam) otalari tarafidan xola bo‘ladi.

Salmo binti Qays (roziyallohu anho) uyidagi yangi pishgan va quritilgan xurmolari bilan madinaliklarni mehmon qilishi tufayli shuhrat qozongan edi. Rasululloh (sollallohu alayhi va sallam) ham uning uyiga tez-tez kelib, uning taomlarini barakali va foydali, deb maqtardilar. Salmo (roziyallohu anho) aytadi: "Rasululloh (sollallohu alayhi va sallam) menikiga Ali (roziyallohu anhu) bilan keldilar. U betob edi. So‘rida uzumim bo‘lib, Payg‘ambarimiz (alayhissalom) va Ali (roziyallohu anhu) undan yeya boshlashdi. Shunda Rasululloh (sollallohu alayhi va sallam):"Ey Ali, bo‘ldi qil. Senga mumkin emas", dedilar. Ali (roziyallohu anhu) qaytib, joyiga o‘tirdi. Men qandlavlagi va arpani pishirib, Payg‘ambarimiz (alayhissalom) oldilariga qo‘ydim. U zot (alayhissalom) Aliga (roziyallohu anhu): "Mana bundan yegin, senga foydali", dedilar (Imom Termiziy).

Shuningdek, Ummu Munzir (roziyallohu anho) juma kuni qand lavlagi va arpadan taom tayyorlab, sahobalarni mehmon qilardi. Sahl (roziyallohu anhu) aytadi: "Juma namozidan so‘ng uning uyiga borib, salom berardik. U oldimizga ovqat qo‘yardi". Ovqatida yog‘ bo‘lmasa ham, juma kuni bo‘lgani uchun quvonardik".

Po‘latxon Kattayev,

Toshkent Islom instituti o‘qituvchisi

• Олдинги
• Кейинги