Ҳудайр

Рукн: Саҳобалар Чоп этилган: 10.10.2016

Расулуллоҳ соллаллоҳу алайҳи васаллам бир неча аскарни бир топшириқ билан жўнатдилар. Улар ичида Ҳудайр исмли саҳоба ҳам бор эди. Ўшанда очарчилик бўлиб, одамларда овқат камайиб кетган эди. Расулуллоҳ соллаллоҳу алайҳи васаллам аскарларнинг барчасини овқат билан таъминладилар-у, лекин Ҳудайрга овқат беришни унутиб қуйдилар. Аммо Ҳудайр сабр қилган ҳолида отлар ортидан: «Ла илаҳа иллаллоҳу валлоҳу акбар, валҳамду лиллаҳи ва субҳаналлоҳи ва ла ҳавла ва ла қуввата илла биллаҳ… Эй Роббим, мана шу менга энг яхши йўл озиғидир», деб сафарга чиқаверди.

Шу пайт Ҳазрати Жаброил Пайғамбаримиз алайҳиссалом ҳузурларига келиб: «Роббим мени ҳузурингизга юбориб, Ҳудайрга йўл озиғи беришни унутганингизни ва у айтаётган калималар қиёмат куни ер билан осмон оралиғида қай даражада нур бўлишини ҳамда унга йўл озиғи жўнатишингиз хабарини беришни буюрди», деди. Расулуллоҳ соллаллоҳу алайҳи васаллам саҳобалардан бир кишини чақириб, унга Ҳудайрнинг йўл озиғини бердилар-да: «Агар унинг олдига етиб борсанг, у нима деётганини ёдлаб ол, йўл озиқ-овқатини топшираётганингда ҳам нима деётганини ёдлаб ол, Расулуллоҳ сенга салом айтдилар, дегин ҳамда унга овқат беришни унутганимни ва Аллоҳ Жаброил алайҳиссаломни юбориб, уни эслатганини, қиёматдаги нурнинг қандай бўлиши хабарини берганини айтгин», дедилар.

Юборилган киши Ҳудайрнинг олдига келганида Ҳудайр бояги сўзларни айтиб кетаётган эди. Кейин унга яқин келиб: «Расулуллоҳ соллаллоҳу алайҳи васаллам сенга салом айтдилар ва мени сенга йўл озиғи билан юбордилар, чунки аввал беришни унутган эканлар. Аллоҳ Жаброил алайҳиссаломни осмондан юбориб, буни эслаттирибди», деди. Шунда Ҳудайр Аллоҳга ҳамду сано ва Расулуллоҳга салавот айтди-да, сўнгра: «Оламлар Рабби Аллоҳга ҳамд булсин. Роббим етти осмон тепасидан, Аршининг юқорисидан туриб очлигим ва заифлигимга раҳм қилибди. Эй Роббим, Сен Ҳудайрни унутмаганингдек, Ҳудайрни ҳам Ўзингни унутмайдиган қилгин», деди. Юборилган киши Ҳудайр айтган сўзларни ёдлаб, Расулуллоҳ соллаллоҳу алайҳи васалламга хабар берган эди, Расулуллоҳ соллаллоҳу алайҳи васаллам : «Агар бошингни осмонга кўтарганингда у айтган сўзлар ер билан осмон оралиғида нур каби таралиб турганини кўрар эдинг», деб марҳамат қилдилар.

Сийрат.уз

* * *

Rasululloh sollallohu alayhi vasallam bir necha askarni bir topshiriq bilan jo‘natdilar. Ular ichida Hudayr ismli sahoba ham bor edi. O‘shanda ocharchilik bo‘lib, odamlarda ovqat kamayib ketgan edi. Rasululloh sollallohu alayhi vasallam askarlarning barchasini ovqat bilan ta’minladilar-u, lekin Hudayrga ovqat berishni unutib quydilar. Ammo Hudayr sabr qilgan holida otlar ortidan: «La ilaha illallohu vallohu akbar, valhamdu lillahi va subhanallohi va la havla va la quvvata illa billah… Ey Robbim, mana shu menga eng yaxshi yo‘l ozig‘idir», deb safarga chiqaverdi.

Shu payt Hazrati Jabroil Payg‘ambarimiz alayhissalom huzurlariga kelib: «Robbim meni huzuringizga yuborib, Hudayrga yo‘l ozig‘i berishni unutganingizni va u aytayotgan kalimalar qiyomat kuni yer bilan osmon oralig‘ida qay darajada nur bo‘lishini hamda unga yo‘l ozig‘i jo‘natishingiz xabarini berishni buyurdi», dedi. Rasululloh sollallohu alayhi vasallam sahobalardan bir kishini chaqirib, unga Hudayrning yo‘l ozig‘ini berdilar-da: «Agar uning oldiga yetib borsang, u nima deyotganini yodlab ol, yo‘l oziq-ovqatini topshirayotganingda ham nima deyotganini yodlab ol, Rasululloh senga salom aytdilar, degin hamda unga ovqat berishni unutganimni va Alloh Jabroil alayhissalomni yuborib, uni eslatganini, qiyomatdagi nurning qanday bo‘lishi xabarini berganini aytgin», dedilar.

Yuborilgan kishi Hudayrning oldiga kelganida Hudayr boyagi so‘zlarni aytib ketayotgan edi. Keyin unga yaqin kelib: «Rasululloh sollallohu alayhi vasallam senga salom aytdilar va meni senga yo‘l ozig‘i bilan yubordilar, chunki avval berishni unutgan ekanlar. Alloh Jabroil alayhissalomni osmondan yuborib, buni eslattiribdi», dedi. Shunda Hudayr Allohga hamdu sano va Rasulullohga salavot aytdi-da, so‘ngra: «Olamlar Rabbi Allohga hamd bulsin. Robbim yetti osmon tepasidan, Arshining yuqorisidan turib ochligim va zaifligimga rahm qilibdi. Ey Robbim, Sen Hudayrni unutmaganingdek, Hudayrni ham O‘zingni unutmaydigan qilgin», dedi. Yuborilgan kishi Hudayr aytgan so‘zlarni yodlab, Rasululloh sollallohu alayhi vasallamga xabar bergan edi, Rasululloh sollallohu alayhi vasallam : «Agar boshingni osmonga ko‘targaningda u aytgan so‘zlar yer bilan osmon oralig‘ida nur kabi taralib turganini ko‘rar eding», deb marhamat qildilar.

Siyrat.uz