Никоҳсиз туғилган қизга уйланса бўладими?

Савол: Никоҳсиз туғилган қизга уйланса ёки никоҳсиз туғилган эркакка муслима қизнинг никоҳланиши жоизми? (Минҳожиддин)

Жавоб: Никоҳи ҳаром қилинган аёллар ичида зинодан туғилган қиз зикр этилмаган. Демак, зинодан туғилган қизга уйланса бўлади. Агар у муслима бўлса, дин-диёнатли, ҳаёли бўлса, бундай қизга уйланишнинг ҳечқиси йўқ.

Бундай ҳолатда гуноҳ ўша қизнинг онасида ва у билан зино қилган кимсада бўлади. Онаси бир вақтлар нафсининг сўзига кириб, қилган хатоси учун қизи жавобгар эмас. Чунки, инсон қайси ота-онадан туғилишини ўзи ҳал қилмайди. Унга қолса, зинодан эмас, энг покиза насабли, энг солиҳ ота-онадан туғилган бўларди. Шундай экан, зинодан туғилган фарзандлар маломат қилинмайди.

Гарчи ота-онасининг бундай хатоси учун фарзанд қонунан ёки шаръан жавобгар бўлмаса ҳам аммо, ҳаёт майдонида баъзан истаса-истамаса жавоб беришга тўғри келиб қолади. Яъни, инсоннинг беникоҳ туғилганлиги кўп ҳолларда одамлар олдида боши хам бўлишига, қаддини тик тутолмаслигига сабаб бўлади. Турли таънаю маломатлар эшитишга ҳам тўғри келади. Таҳқиромуз муомалаларга дуч келади. Зеро, инсоннинг солиҳлиги ва тақводорлиги ризқ кенгайиши, салоҳият, илм, иқтидор ва тақво каби ижобий кўринишларда унинг зурриётларида ўз ифодасини топгани каби фисқу фужур ва ҳаром юриш каби разолатлар ҳам зурриётларга салбий таъсирини кўрсатмай қолмайди. Шу боис ҳам баъзи уламолар беникоҳ туғилган одам шаръий никоҳ орқали туғилган инсондек кўплаб фазилатлар орттира олмайди, камолот касб этиши қийин бўлади, деб айтганлар. Шунинг ўзи кишидаги салоҳият ёки ёмонликнинг авлод ва зурриётга ўзининг ижобий ёки салбий натижаси билан тарқалишига далолат қилади.

Шунингдек, баъзи уламолар насаби пок қиз турганда зинодан туғилган қизга уйланиш макруҳлигини айтишган экан. Валлоҳу аълам!

Одилхон қори Юнусхон ўғли (muxlis.uz)

* * *

Savol: Nikohsiz tug‘ilgan qizga uylansa yoki nikohsiz tug‘ilgan erkakka muslima qizning nikohlanishi joizmi? (Minhojiddin)

Javob: Nikohi harom qilingan ayollar ichida zinodan tug‘ilgan qiz zikr etilmagan. Demak, zinodan tug‘ilgan qizga uylansa bo‘ladi. Agar u muslima bo‘lsa, din-diyonatli, hayoli bo‘lsa, bunday qizga uylanishning hechqisi yo‘q.

Bunday holatda gunoh o‘sha qizning onasida va u bilan zino qilgan kimsada bo‘ladi. Onasi bir vaqtlar nafsining so‘ziga kirib, qilgan xatosi uchun qizi javobgar emas. Chunki, inson qaysi ota-onadan tug‘ilishini o‘zi hal qilmaydi. Unga qolsa, zinodan emas, eng pokiza nasabli, eng solih ota-onadan tug‘ilgan bo‘lardi. Shunday ekan, zinodan tug‘ilgan farzandlar malomat qilinmaydi.

Garchi ota-onasining bunday xatosi uchun farzand qonunan yoki shar’an javobgar bo‘lmasa ham ammo, hayot maydonida ba’zan istasa-istamasa javob berishga to‘g‘ri kelib qoladi. Ya’ni, insonning benikoh tug‘ilganligi ko‘p hollarda odamlar oldida boshi xam bo‘lishiga, qaddini tik tutolmasligiga sabab bo‘ladi. Turli ta’nayu malomatlar eshitishga ham to‘g‘ri keladi. Tahqiromuz muomalalarga duch keladi. Zero, insonning solihligi va taqvodorligi rizq kengayishi, salohiyat, ilm, iqtidor va taqvo kabi ijobiy ko‘rinishlarda uning zurriyotlarida o‘z ifodasini topgani kabi fisqu fujur va harom yurish kabi razolatlar ham zurriyotlarga salbiy ta’sirini ko‘rsatmay qolmaydi. Shu bois ham ba’zi ulamolar benikoh tug‘ilgan odam shar’iy nikoh orqali tug‘ilgan insondek ko‘plab fazilatlar orttira olmaydi, kamolot kasb etishi qiyin bo‘ladi, deb aytganlar. Shuning o‘zi kishidagi salohiyat yoki yomonlikning avlod va zurriyotga o‘zining ijobiy yoki salbiy natijasi bilan tarqalishiga dalolat qiladi.

Shuningdek, ba’zi ulamolar nasabi pok qiz turganda zinodan tug‘ilgan qizga uylanish makruhligini aytishgan ekan. Vallohu a’lam!

Odilxon qori Yunusxon o‘g‘li (muxlis.uz)

• Олдинги
• Кейинги