Фарзанд бўлмагач, сунъий уруғлантириш мумкинми?

Савол: Бир танишим фарзандли бўлмагач, шифохонага хотини билан бориб хотинининг бачадонига бегона эркакнинг уруғини эктирмоқчи. Ҳозир кўпчилик шундай қиляпти. Бу фарзанд валади зино бўлмайдими?

Жавоб: Бундай йўл билан туғилган бола валади зино бўлади. Бунга рози бўлган киши катта гуноҳ қилган бўлади. Инсон фарзандсиз яшаса ҳам бахтиёр ҳаёт кечира олади. Аксинча, баъзи оилалар фарзандлари бор бўлгани учун турли ташвишларга дуч келишяпти. Болалари ўша ота-оналарнинг бошларига етти ухлаб тушга кирмаган мусибатларни олиб келяпти. Дўстингиз Аллоҳ таолонинг тақсимотига рози бўлсин. Фарзандли бўлиш учун даволансин, шаръий йўл ахтарсин. Асло ва асло юқорида айтилган йўл билан бола орттирмасин.

Ўзбекистон Мусулмонлари идораси Фатво ҳайъати

Савол: Фарзандли бўлмаётган, никоҳдаги эркак ва аёл уруғини пробиркада урчитиб, сўнг аёл бачадонига жойлаш амалиётига Ислом динида рухсат берилганми?

Жавоб: Оилали бўла туриб ҳомиладор бўлмаётган аёл ва унинг эрининг болага бўлган ҳожати шаръий ғараз деб эътибор қилинади. Улар ўзларини бу маънода даволатишлари мубоҳдир. Жумладан, сунъий урчитиш йўли билан ҳам.

Эрнинг уруғлигини олиб унинг хотини бачадонига қўйиб урчитиш шариат бўйича жоиздир.

Эру хотин икковларидан уруғликларини олиб найчада урчитиб сўнгра хотиннинг бачадонига солиб қўйиш ҳам шариат бўйича жоиздир.

Бошқа услуб билан бўладиган сунъий урчитишнинг турлари мумкин эмас.

Шу билан бирга, сунъий урчитишни амалга ошириш жараёнида ислом шариати қоидаларига амал қилиш лозим. Иложи борича, муслима табиба даволанаётган аёлга қарасин.

Робитатул Оламил Исломий ҳузуридаги Ислом Фиқҳи Академияси қарори, 23 - 30 Рабийъус Соний 1400 ҳ.с.

Savol: Bir tanishim farzandli bo‘lmagach, shifoxonaga xotini bilan borib xotinining bachadoniga begona erkakning urug‘ini ektirmoqchi. Hozir ko‘pchilik shunday qilyapti. Bu farzand valadi zino bo‘lmaydimi?

Javob: Bunday yo‘l bilan tug‘ilgan bola valadi zino bo‘ladi. Bunga rozi bo‘lgan kishi katta gunoh qilgan bo‘ladi. Inson farzandsiz yashasa ham baxtiyor hayot kechira oladi. Aksincha, ba’zi oilalar farzandlari bor bo‘lgani uchun turli tashvishlarga duch kelishyapti. Bolalari o‘sha ota-onalarning boshlariga yetti uxlab tushga kirmagan musibatlarni olib kelyapti. Do‘stingiz Alloh taoloning taqsimotiga rozi bo‘lsin. Farzandli bo‘lish uchun davolansin, shar’iy yo‘l axtarsin. Aslo va aslo yuqorida aytilgan yo‘l bilan bola orttirmasin.

O‘zbekiston Musulmonlari idorasi Fatvo hay’ati

Savol: Farzandli bo‘lmayotgan, nikohdagi erkak va ayol urug‘ini probirkada urchitib, so‘ng ayol bachadoniga joylash amaliyotiga Islom dinida ruxsat berilganmi?

Javob: Oilali bo‘la turib homilador bo‘lmayotgan ayol va uning erining bolaga bo‘lgan hojati shar’iy g‘araz deb e’tibor qilinadi. Ular o‘zlarini bu ma’noda davolatishlari mubohdir. Jumladan, sun’iy urchitish yo‘li bilan ham.

Erning urug‘ligini olib uning xotini bachadoniga qo‘yib urchitish shariat bo‘yicha joizdir.

Eru xotin ikkovlaridan urug‘liklarini olib naychada urchitib so‘ngra xotinning bachadoniga solib qo‘yish ham shariat bo‘yicha joizdir.

Boshqa uslub bilan bo‘ladigan sun’iy urchitishning turlari mumkin emas.

Shu bilan birga, sun’iy urchitishni amalga oshirish jarayonida islom shariati qoidalariga amal qilish lozim. Iloji boricha, muslima tabiba davolanayotgan ayolga qarasin.

Robitatul Olamil Islomiy huzuridagi Islom Fiqhi Akademiyasi qarori, 23 - 30 Rabiy’us Soniy 1400 h.s.

• Олдинги
• Кейинги