Ғаройиб ўн олтилик

Аллоҳ барчамизга ҳаёт бериб қўйган. У бизга омонат. Уни рисоладагидек, жамият ва оиламиз учун фойдали яшаяпмизми? Албатта, ҳаммамиз учун жон ширин, лекин доим ҳам тўғри йўл тутиш имкони бўлмайди. Қуйида ҳаётимизга мазмун ва ранг-баранглик олиб кирувчи, руҳан ва жисмонан саломатлигимизни мустаҳкамловчи 16 тавсияни сизга илинмоқдамиз:

Танаффус қилинг! Қилаётган ишларингиздан бироз фориғ бўлиб, нимадир бошқача иш қилинг: ўқиган мактабингизга боринг, саёҳатга отланинг, анчадан бери кўришмаган қариндошингизникига боринг ва ҳоказо.

“Йўқ” дейишни ўрганинг! Бировнинг илтимосига рад жавобини бериш мушкул. Аммо сиз қўлингиздан келмайдиган ишга “ҳа” деб қўйиб, ортиқча ташвиш орттирасиз. Йўқ жойдан ўзингизга муаммо чиқариб, ўнғайсиз аҳволга тушиб қолмаслик учун, аввал ўйлаб, кейин ваъда берганингиз маъқул. Одамлар олдида ноқулай ҳолатга тушавериш стрессга олиб бориши мумкин.

Машқ қилинг! Қанча кўп жисмоний машқларни бажарсангиз, шунча ёш ва кўркам бўласиз. Олимларнинг айтишича, кунига 15 минутлик машқлар инсон умрини ўртача 3 йилга узайтирар экан.

Хатоларингиздан хулоса чиқаринг! Бирор хатога йўл қўйганингизда уни янги нарса ўрганиш учун имконият деб билинг. Битта хатони қайта-қайта такрорлайверманг. Бу атрофдагиларнинг ишнчини ва ўзингизнинг ўзингизга бўлган ишончингизни емиради.

Ҳаётингизни соддалаштиринг! Одамларда одатда керагидан ошиқроқ нарсалар бўлади. Уйингиз, умуман, атрофингиздаги сизга керак бўлмаган нарсаларни камайтиринг. Анча енгиллашасиз!

Яхшилик қилиб туринг! Атрофдагиларга беғараз кўмак беришни канда қилманг. Тадқиқотлар кўрсатишича, одамларга ёрдам бериб яшайдиган инсонлар бахтлироқ ва узоқроқ умр кечирадилар.

Яхши тарафни кўришга ҳаракат қилинг! Олимларнинг таъкидлашича, оптимистлар пессимистларга нисбатан 7.5 йил узоқ яшаркан. Қувноқ инсонларнинг дўст орттириши осон бўлиши ҳам бор гап.

Уйқунгиз маромида бўлсин! Қулай ётоқ ва маромидаги уйқу ҳаётимизга ёрқин ранглар қўшиши аниқ.

Пул жамғаринг! Пул жамғаришнинг кечи йўқ. Кўп бўлиши шартмас. Иложи борича эртароқ бошланг жамғаришни. Зарур пайтда бировнинг қўлига қараб қолмайсиз.

Яхши овқатланинг! Мева ва сабзавотларнинг кўп истеъол қилиш, парҳез тутиб туриш танамизга кони фойда.

Ташланг! Ҳа, ичиш ва чекишни ташланг. Ташлаганингизни жисмингиз 24 соат ичида сезади. Бундан танангиз ҳам, кармонингиз ҳам наф кўради.

Тишларингизни текширтиринг! Кўпчилиик стоматологни хушламайди, лекин вақтида бормасангиз, кейин афсус қиласиз. Йилда икки бор стоматолог қабулида бўлинг.

Жилмайинг! Самимий табассум ва беозор кулгу инсон умрини узайтириши сир эмас. Кулгу яхшигина жисмоний машқ ҳамдир.

Сув ичинг! Сув сизни соғлом, чиройли ва хотиржам қилади.

Хавотирланманг! Ўзингизда йўқ нарса учун ташвиш чекманг. Ҳозир йўқлигининг боиси – ҳали мавриди эмас. Агар Аллоҳ истаса, вақти келиб, бўлади.

Асосийси, тақдирингиздан асло нолиманг! Бу сизга ҳеч қандай наф бермайди! Ҳаётингизда бор одамлар ва нарсалар учун Парвардигорга ҳамду санолар айтинг.

“Ирфон” тақвимининг 2013 йил 4-сонидан олинди.

* * *

Alloh barchamizga hayot berib qo‘ygan. U bizga omonat. Uni risoladagidek, jamiyat va oilamiz uchun foydali yashayapmizmi? Albatta, hammamiz uchun jon shirin, lekin doim ham to‘g‘ri yo‘l tutish imkoni bo‘lmaydi. Quyida hayotimizga mazmun va rang-baranglik olib kiruvchi, ruhan va jismonan salomatligimizni mustahkamlovchi 16 tavsiyani sizga ilinmoqdamiz:

Tanaffus qiling! Qilayotgan ishlaringizdan biroz forig‘ bo‘lib, nimadir boshqacha ish qiling: o‘qigan maktabingizga boring, sayohatga otlaning, anchadan beri ko‘rishmagan qarindoshingiznikiga boring va hokazo.

“Yo‘q” deyishni o‘rganing! Birovning iltimosiga rad javobini berish mushkul. Ammo siz qo‘lingizdan kelmaydigan ishga “ha” deb qo‘yib, ortiqcha tashvish orttirasiz. Yo‘q joydan o‘zingizga muammo chiqarib, o‘ng‘aysiz ahvolga tushib qolmaslik uchun, avval o‘ylab, keyin va’da berganingiz ma’qul. Odamlar oldida noqulay holatga tushaverish stressga olib borishi mumkin.

Mashq qiling! Qancha ko‘p jismoniy mashqlarni bajarsangiz, shuncha yosh va ko‘rkam bo‘lasiz. Olimlarning aytishicha, kuniga 15 minutlik mashqlar inson umrini o‘rtacha 3 yilga uzaytirar ekan.

Xatolaringizdan xulosa chiqaring! Biror xatoga yo‘l qo‘yganingizda uni yangi narsa o‘rganish uchun imkoniyat deb biling. Bitta xatoni qayta-qayta takrorlayvermang. Bu atrofdagilarning ishnchini va o‘zingizning o‘zingizga bo‘lgan ishonchingizni yemiradi.

Hayotingizni soddalashtiring! Odamlarda odatda keragidan oshiqroq narsalar bo‘ladi. Uyingiz, umuman, atrofingizdagi sizga kerak bo‘lmagan narsalarni kamaytiring. Ancha yengillashasiz!

Yaxshilik qilib turing! Atrofdagilarga beg‘araz ko‘mak berishni kanda qilmang. Tadqiqotlar ko‘rsatishicha, odamlarga yordam berib yashaydigan insonlar baxtliroq va uzoqroq umr kechiradilar.

Yaxshi tarafni ko‘rishga harakat qiling! Olimlarning ta’kidlashicha, optimistlar pessimistlarga nisbatan 7.5 yil uzoq yasharkan. Quvnoq insonlarning do‘st orttirishi oson bo‘lishi ham bor gap.

Uyqungiz maromida bo‘lsin! Qulay yotoq va maromidagi uyqu hayotimizga yorqin ranglar qo‘shishi aniq.

Pul jamg‘aring! Pul jamg‘arishning kechi yo‘q. Ko‘p bo‘lishi shartmas. Iloji boricha ertaroq boshlang jamg‘arishni. Zarur paytda birovning qo‘liga qarab qolmaysiz.

Yaxshi ovqatlaning! Meva va sabzavotlarning ko‘p iste’ol qilish, parhez tutib turish tanamizga koni foyda.

Tashlang! Ha, ichish va chekishni tashlang. Tashlaganingizni jismingiz 24 soat ichida sezadi. Bundan tanangiz ham, karmoningiz ham naf ko‘radi.

Tishlaringizni tekshirtiring! Ko‘pchiliik stomatologni xushlamaydi, lekin vaqtida bormasangiz, keyin afsus qilasiz. Yilda ikki bor stomatolog qabulida bo‘ling.

Jilmaying! Samimiy tabassum va beozor kulgu inson umrini uzaytirishi sir emas. Kulgu yaxshigina jismoniy mashq hamdir.

Suv iching! Suv sizni sog‘lom, chiroyli va xotirjam qiladi.

Xavotirlanmang! O‘zingizda yo‘q narsa uchun tashvish chekmang. Hozir yo‘qligining boisi – hali mavridi emas. Agar Alloh istasa, vaqti kelib, bo‘ladi.

Asosiysi, taqdiringizdan aslo nolimang! Bu sizga hech qanday naf bermaydi! Hayotingizda bor odamlar va narsalar uchun Parvardigorga hamdu sanolar ayting.

“Irfon” taqvimining 2013 yil 4-sonidan olindi.

• Олдинги
• Кейинги