Рамазондаги беш мукофот

Абу Ҳурайра (р.а.)дан ривоят қилинган ҳадисда Расулуллоҳ (с.а.в.): «Рамазон ойида умматимга олдинги умматларга берилмаган бешта хислат (мукофот) берилади», дейилган («Танбеҳул ғофилин» китобидан).

«Бақара» сурасининг 183-оятида Аллоҳ таоло бундай марҳамат қилади: «...сизлардан олдинги (уммат)ларга фарз қилингани каби сизларга ҳам рўза тутиш фарз қилинди».

Ояти каримадан маълум бўладики, олдинги умматларга ҳам рўза фарз қилинган, аммо ҳадисда айтилганидек, беш мукофот фақат уммати Муҳаммадга берилди. Зотан, Пайғамбаримиз (с.а.в.)нинг даражалари улуғ, умматларига кўрсатилаётган икромлар ҳам шунга кўрадир.

Юқорида келтирилган ҳадис давомида Пайғамбаримиз (с.а.в.) беш мукофотни санаб ўтдилар:

1. «Рўзадорнинг оғзидан келаётган ҳид Аллоҳ наздида мушку анбар бўйидан ҳам яхшироқдир».

Рўза тутиб, оч қолган кишининг оғзи ҳидланиши табиий. Бошқалар учун нохуш туюлган бу ҳид Аллоҳ учун севимли. Рўзадор учун биринчи мукофот охиратда оғзидаги мушк каби хуш ислар билан Аллоҳ таолога рўбарў бўлишидир.

2. «Оғиз очгунларича фаришталар улар ҳақига истиғфор айтиб турадилар». Яъни, рўзадор Аллоҳга маҳбуб банда бўлганидек, махлуқотга ҳам севимли бўлади. Аллоҳ таолонинг ҳеч гуноҳ қилмайдиган бандалари бўлмиш фаришталар рўза тутган киши ҳақига дуо қиладилар. Демак, рўза тутувчи кишининг Аллоҳ ҳузурида, махлуқот олдида ҳам қадр-қиммати юксак – бу иккинчи мукофот.

3. «Шайтонлар кишанланиб, илгари қилиб юрган ёмонликларини қила олишмайди». Бу ойда барча шайтонлар занжирбанд этилади, бошқа пайтларда бўлганидек, эркин ҳаракатланишларига изн берилмайди. Йўлдан оздириш, васваса қилиш, алдаш каби ишларни ҳар кунгидек осонлик билан уддалашолмайди. Уммати Муҳаммадга учинчи мукофот – ибодат қилиш осон бўлади, яхши иш қилишни истаганлар ёқаларини шайтон қўлидан қутқаришга эришишади.

4. «Аллоҳ таоло ҳар куни жаннатини безатиб, унга: «Солиҳ бандаларимнинг дунёдаги машаққат ва азиятлари тугаб, сенга киришларига яқин қолди», деб айтади». Яъни, рўзадорлар учун тўртинчи мукофот – жаннат. Охиратда: «Менинг розилигимни кўзлаб рўза тутган бандаларим, киринглар», дейилганда жаннатдаги Раййон номли эшикдан фақат рўза тутувчиларгина киришади.

5. Бешинчи, энг сўнгги мукофот, табиийки, муборак ойнинг охирги кунлари билан боғлиқ. «Рамазоннинг охирги кечасида эса уларнинг гуноҳлари кечирилади». Шунда саҳобалар: «Эй Расулуллоҳ! Ўша Қадр кечаси бўладими?» деб сўрашди. Расулуллоҳ (с.а.в.): «Йўқ, аммо ишчининг иш ҳақи ишни мукаммал адо қилиб бўлганидан кейин берилади», дедилар». Демак, бу кеча ҳайит кунининг кечаси. Аллоҳ таоло барчамизни ҳайит айёмини Ўз мағфиратига эришган ҳолда кутиб олган масъуд бандалари қаторида қилсин.

Юқорида санаб ўтилган мукофотлар Аллоҳ таолодан Муҳаммад умматига кўрсатилган улуғ эҳсон. Улардан бебаҳра қолишдан асрасин! Пайғамбаримиз (с.а.в.) таъриф этганларидек, Аллоҳ таоло барчамизга Ўзини рози ва хушнуд қиладиган, қабул этиладиган даражада рўза тутишни, ибодатлар, таровеҳларни ўз вақтида, ўз ўрнида, одоб ва ҳузур ила адо этишни насиб айласин!

“Ирфон” тақвимининг 2011 йил, 3-сонидан олинди.

* * *

Abu Hurayra (r.a.)dan rivoyat qilingan hadisda Rasululloh (s.a.v.): «Ramazon oyida ummatimga oldingi ummatlarga berilmagan beshta xislat (mukofot) beriladi», deyilgan («Tanbehul g‘ofilin» kitobidan).

«Baqara» surasining 183-oyatida Alloh taolo bunday marhamat qiladi: «...sizlardan oldingi (ummat)larga farz qilingani kabi sizlarga ham ro‘za tutish farz qilindi».

Oyati karimadan ma’lum bo‘ladiki, oldingi ummatlarga ham ro‘za farz qilingan, ammo hadisda aytilganidek, besh mukofot faqat ummati Muhammadga berildi. Zotan, Payg‘ambarimiz (s.a.v.)ning darajalari ulug‘, ummatlariga ko‘rsatilayotgan ikromlar ham shunga ko‘radir.

Yuqorida keltirilgan hadis davomida Payg‘ambarimiz (s.a.v.) besh mukofotni sanab o‘tdilar:

1. «Ro‘zadorning og‘zidan kelayotgan hid Alloh nazdida mushku anbar bo‘yidan ham yaxshiroqdir».

Ro‘za tutib, och qolgan kishining og‘zi hidlanishi tabiiy. Boshqalar uchun noxush tuyulgan bu hid Alloh uchun sevimli. Ro‘zador uchun birinchi mukofot oxiratda og‘zidagi mushk kabi xush islar bilan Alloh taologa ro‘baro‘ bo‘lishidir.

2. «Og‘iz ochgunlaricha farishtalar ular haqiga istig‘for aytib turadilar». Ya’ni, ro‘zador Allohga mahbub banda bo‘lganidek, maxluqotga ham sevimli bo‘ladi. Alloh taoloning hech gunoh qilmaydigan bandalari bo‘lmish farishtalar ro‘za tutgan kishi haqiga duo qiladilar. Demak, ro‘za tutuvchi kishining Alloh huzurida, maxluqot oldida ham qadr-qimmati yuksak – bu ikkinchi mukofot.

3. «Shaytonlar kishanlanib, ilgari qilib yurgan yomonliklarini qila olishmaydi». Bu oyda barcha shaytonlar zanjirband etiladi, boshqa paytlarda bo‘lganidek, erkin harakatlanishlariga izn berilmaydi. Yo‘ldan ozdirish, vasvasa qilish, aldash kabi ishlarni har kungidek osonlik bilan uddalasholmaydi. Ummati Muhammadga uchinchi mukofot – ibodat qilish oson bo‘ladi, yaxshi ish qilishni istaganlar yoqalarini shayton qo‘lidan qutqarishga erishishadi.

4. «Alloh taolo har kuni jannatini bezatib, unga: «Solih bandalarimning dunyodagi mashaqqat va aziyatlari tugab, senga kirishlariga yaqin qoldi», deb aytadi». Ya’ni, ro‘zadorlar uchun to‘rtinchi mukofot – jannat. Oxiratda: «Mening roziligimni ko‘zlab ro‘za tutgan bandalarim, kiringlar», deyilganda jannatdagi Rayyon nomli eshikdan faqat ro‘za tutuvchilargina kirishadi.

5. Beshinchi, eng so‘nggi mukofot, tabiiyki, muborak oyning oxirgi kunlari bilan bog‘liq. «Ramazonning oxirgi kechasida esa ularning gunohlari kechiriladi». Shunda sahobalar: «Ey Rasululloh! O‘sha Qadr kechasi bo‘ladimi?» deb so‘rashdi. Rasululloh (s.a.v.): «Yo‘q, ammo ishchining ish haqi ishni mukammal ado qilib bo‘lganidan keyin beriladi», dedilar». Demak, bu kecha hayit kunining kechasi. Alloh taolo barchamizni hayit ayyomini O‘z mag‘firatiga erishgan holda kutib olgan mas’ud bandalari qatorida qilsin.

Yuqorida sanab o‘tilgan mukofotlar Alloh taolodan Muhammad ummatiga ko‘rsatilgan ulug‘ ehson. Ulardan bebahra qolishdan asrasin! Payg‘ambarimiz (s.a.v.) ta’rif etganlaridek, Alloh taolo barchamizga O‘zini rozi va xushnud qiladigan, qabul etiladigan darajada ro‘za tutishni, ibodatlar, tarovehlarni o‘z vaqtida, o‘z o‘rnida, odob va huzur ila ado etishni nasib aylasin!

“Irfon” taqvimining 2011 yil, 3-sonidan olindi.

• Олдинги
• Кейинги