Намознинг саломатликка фойдалари

Аллоҳ таолонинг амр ва буйруқларида беҳисоб ҳикмат, фойдалар, таъқиқ ва қайтариқларида эса, шубҳасиз, кўпгина зарарлар борлигини бугунги кун тиббиёти ҳам эътироф этади. Зеро, исломдаги каби саломатликка эътибор бошқа динларда йўқ.

Динимизда ибодатларнинг энг афзали бўлмиш намозни ҳаётимиз охирига қадар ўқишимиз буюрилган. Таъкидлаш лозимки, намоз ибодатини адо этиш билан аввало Аллоҳнинг амрини, бандалик фарзимизни бажарамиз. Шу билан бирга, саломатлигимиз билан боғлиқ қуйидаги фойдаларни қўлга киритамиз:

– намозда қилинадиган ҳаракатлар сокин бўлгани ва куннинг турли вақтларида амалга оширилгани сабабли юракка оғир келмайди ҳамда инсонни доим хотиржам тутади;

– кунига бошини 80 маротаба ерга теккизган одамнинг миясига қон кўпроқ етиб боради, мия ҳужайралари яхши озиқланади. Шу туфайли хотира сустлиги ҳамда руҳий муаммолар намозхонларда камроқ учрайди;

– ибодат жараёнида мунтазам эгилиб-ростлангани сабаб намозхонларнинг кўзларида яхшироқ қон айланиши кузатилади. Бинобарин, кўзнинг қон босими ошиб кетмайди, тез-тез намланиб туриши таъминланади, катаракта ва шунга ўхшаш касалликлардан ҳимояланади;

– намоз ҳаракатлари ошқозонда ҳазм жараёнини осонлаштиришдан ташқари, қабзиятни кеткизишга ёрдам беради. Буйрак ва сийдик йўллари яхши чайқалишидан буйракда тош пайдо бўлишининг олдини олади;

– беш вақт ўқилган намоздаги ритмик ҳаракатлар кундалик ҳаётда ишлатилмайдиган бўғим, мушакларни ҳаракатга солиб, артрит каби бўғим касалликлари ва тўқима тиқинларининг олдини олади;

– уйқуни тартибга соладиган энг кучли омил намоздир. Ҳатто танадаги турғун электр заряди сажда қилинганда ерлатилган бўлади. Шу тариқа вужуд янгиланиб олади.

Юқоридаги фойдаларга эришиш учун намозни вақтида ўқиш, тозалик ва овқатланишдаги меъёрга, яъни кўп емасликка эътибор бериш лозим бўлади.

“Ирфон” тақвимининг 2010 йил, 1-сонидан олинди.

* * *

Alloh taoloning amr va buyruqlarida behisob hikmat, foydalar, ta’qiq va qaytariqlarida esa, shubhasiz, ko‘pgina zararlar borligini bugungi kun tibbiyoti ham e’tirof etadi. Zero, islomdagi kabi salomatlikka e’tibor boshqa dinlarda yo‘q.

Dinimizda ibodatlarning eng afzali bo‘lmish namozni hayotimiz oxiriga qadar o‘qishimiz buyurilgan. Ta’kidlash lozimki, namoz ibodatini ado etish bilan avvalo Allohning amrini, bandalik farzimizni bajaramiz. Shu bilan birga, salomatligimiz bilan bog‘liq quyidagi foydalarni qo‘lga kiritamiz:

– namozda qilinadigan harakatlar sokin bo‘lgani va kunning turli vaqtlarida amalga oshirilgani sababli yurakka og‘ir kelmaydi hamda insonni doim xotirjam tutadi;

– kuniga boshini 80 marotaba yerga tekkizgan odamning miyasiga qon ko‘proq yetib boradi, miya hujayralari yaxshi oziqlanadi. Shu tufayli xotira sustligi hamda ruhiy muammolar namozxonlarda kamroq uchraydi;

– ibodat jarayonida muntazam egilib-rostlangani sabab namozxonlarning ko‘zlarida yaxshiroq qon aylanishi kuzatiladi. Binobarin, ko‘zning qon bosimi oshib ketmaydi, tez-tez namlanib turishi ta’minlanadi, katarakta va shunga o‘xshash kasalliklardan himoyalanadi;

– namoz harakatlari oshqozonda hazm jarayonini osonlashtirishdan tashqari, qabziyatni ketkizishga yordam beradi. Buyrak va siydik yo‘llari yaxshi chayqalishidan buyrakda tosh paydo bo‘lishining oldini oladi;

– besh vaqt o‘qilgan namozdagi ritmik harakatlar kundalik hayotda ishlatilmaydigan bo‘g‘im, mushaklarni harakatga solib, artrit kabi bo‘g‘im kasalliklari va to‘qima tiqinlarining oldini oladi;

– uyquni tartibga soladigan eng kuchli omil namozdir. Hatto tanadagi turg‘un elektr zaryadi sajda qilinganda yerlatilgan bo‘ladi. Shu tariqa vujud yangilanib oladi.

Yuqoridagi foydalarga erishish uchun namozni vaqtida o‘qish, tozalik va ovqatlanishdagi me’yorga, ya’ni ko‘p yemaslikka e’tibor berish lozim bo‘ladi.

“Irfon” taqvimining 2010 yil, 1-sonidan olindi.

• Олдинги
• Кейинги