Жаннатга элтувчи амал

Анас разияллоҳу анҳудан ривоят қилинади: “Бизлар Расулуллоҳ саллаллоҳу алайҳи ва салламнинг ҳузурларида ўтирган эдик: “Ҳозир сизларнинг олдингизга жаннат аҳлидан бир киши келиб қолади” — дедилар. Ансорлардан бир киши соқолидан таҳоратининг сувлари томиб, чап қўлига ковушини кўтарган ҳолда кириб келди.

Эртаси куни Пайғамбар саллаллоҳу алайҳи ва саллам яна ўша сўзни айтдилар. Яна ўша киши аввалги ҳолида кириб келди. Учинчи куни ҳам шу ҳолат такрорланди.

Пайғамбар саллаллоҳу алайҳи ва саллам ўринларидан туриб кетганларидан сўнг Абдуллоҳ ибн Амр ибн Осс разияллоҳу анҳу ҳалиги ансорийнинг ортидан бориб:

— Мен билан отам орасида бир нарса ўтиб қолди. Унинг олдига уч кунгача кирмасликка қасам ичиб қўйдим, агар хўп десанг уч кунни сенинг уйингда ўтказсам, — деди.

— Майли, — деди ансорий.

Анас разияллоҳу анҳу айтади: “Абдуллоҳ айтиб юрар эди: “У билан бирга ўша уч кечани ўтказдим. Кечалари бомдод намозига тургунгача бошқа ҳеч бир ўрнидан турганини кўрмадим. Фақат кўрпасини ёпинса ёки бир ёнбошига ағдарилса, Аллоҳ азза ва жаллани зикр қилар ва “Аллоҳу акбар” деб қўяр эди.

Яхшиликдан бошқа сўз айтганини эшитмадим, — дейди Абдулоҳ. — Уч кеча ўтиб бўлди, менга унинг амаллари оз кўринди.

— Эй Аллоҳнинг бандаси, мен билан отамнинг ўртамизда ҳеч нарса ўтмаган эди, — дедим. — Лекин мен Расулуллоҳ саллаллоҳу алайҳи ва саллам сен ҳақингда уч бора “Ҳозир сизларнинг олдингизга жаннат аҳлидан бир киши келиб қолади”, деганларини эшитдим. Учала сафар ҳам сен келдинг. Шунинг учун сенинг амалларингни кўргани уйингга киришни ихтиёр қилдим. Аммо сендан бирор катта амал содир бўлганлигини кўрмадим. Хўш, Расулуллоҳ саллаллоҳу алайҳи ва саллам сен ҳақингда айтган сўзлардаги даражаларга етиштирган амал нима ўзи?

— У нарса мана шу сен кўрганингдан бошқа нарса эмас, — деди ансорий.

Мен ортимга қайтиб кетаётган эдим, чақириб:

— У нарса мана шу сен кўрганингдан бошқа нарса эмас, фақат бундан ташқари шу нарса борки, мен қалбимда ҳеч қачон бирор мусулмонга хиёнат ва фирибгарлик кўрмадим. Бирорта мусулмонга Аллоҳ таоло ато қилган яхшиликка ҳасад қилмадим, — деди”.

— Ҳа, мана шу экан сенга (жаннат башорати бўлишига) олиб келган! Мана шу экан бизларнинг тоқатимиз етмайдиган амал! — деди Абдуллоҳ ибн Амр разияллоҳу анҳу.

Шайх Аҳмад Муҳаммад Ассофнинг “Қабасотун мин ҳаётир-Расул” китобидан Шаҳобиддин Парпиев таржимаси.

Anas raziyallohu anhudan rivoyat qilinadi: “Bizlar Rasululloh sallallohu alayhi va sallamning huzurlarida o‘tirgan edik: “Hozir sizlarning oldingizga jannat ahlidan bir kishi kelib qoladi” — dedilar. Ansorlardan bir kishi soqolidan tahoratining suvlari tomib, chap qo‘liga kovushini ko‘targan holda kirib keldi.

Ertasi kuni Payg‘ambar sallallohu alayhi va sallam yana o‘sha so‘zni aytdilar. Yana o‘sha kishi avvalgi holida kirib keldi. Uchinchi kuni ham shu holat takrorlandi.

Payg‘ambar sallallohu alayhi va sallam o‘rinlaridan turib ketganlaridan so‘ng Abdulloh ibn Amr ibn Oss raziyallohu anhu haligi ansoriyning ortidan borib:

— Men bilan otam orasida bir narsa o‘tib qoldi. Uning oldiga uch kungacha kirmaslikka qasam ichib qo‘ydim, agar xo‘p desang uch kunni sening uyingda o‘tkazsam, — dedi.

— Mayli, — dedi ansoriy.

Anas raziyallohu anhu aytadi: “Abdulloh aytib yurar edi: “U bilan birga o‘sha uch kechani o‘tkazdim. Kechalari bomdod namoziga turgungacha boshqa hech bir o‘rnidan turganini ko‘rmadim. Faqat ko‘rpasini yopinsa yoki bir yonboshiga ag‘darilsa, Alloh azza va jallani zikr qilar va “Allohu akbar” deb qo‘yar edi.

Yaxshilikdan boshqa so‘z aytganini eshitmadim, — deydi Abduloh. — Uch kecha o‘tib bo‘ldi, menga uning amallari oz ko‘rindi.

— Ey Allohning bandasi, men bilan otamning o‘rtamizda hech narsa o‘tmagan edi, — dedim. — Lekin men Rasululloh sallallohu alayhi va sallam sen haqingda uch bora “Hozir sizlarning oldingizga jannat ahlidan bir kishi kelib qoladi”, deganlarini eshitdim. Uchala safar ham sen kelding. Shuning uchun sening amallaringni ko‘rgani uyingga kirishni ixtiyor qildim. Ammo sendan biror katta amal sodir bo‘lganligini ko‘rmadim. Xo‘sh, Rasululloh sallallohu alayhi va sallam sen haqingda aytgan so‘zlardagi darajalarga yetishtirgan amal nima o‘zi?

— U narsa mana shu sen ko‘rganingdan boshqa narsa emas, — dedi ansoriy.

Men ortimga qaytib ketayotgan edim, chaqirib:

— U narsa mana shu sen ko‘rganingdan boshqa narsa emas, faqat bundan tashqari shu narsa borki, men qalbimda hech qachon biror musulmonga xiyonat va firibgarlik ko‘rmadim. Birorta musulmonga Alloh taolo ato qilgan yaxshilikka hasad qilmadim, — dedi”.

— Ha, mana shu ekan senga (jannat bashorati bo‘lishiga) olib kelgan! Mana shu ekan bizlarning toqatimiz yetmaydigan amal! — dedi Abdulloh ibn Amr raziyallohu anhu.

Shayx Ahmad Muhammad Assofning “Qabasotun min hayotir-Rasul” kitobidan Shahobiddin Parpiyev tarjimasi.

• Олдинги
• Кейинги